Kelompok Ternak Lembu Mukti Andini Samekta Ngingah Lembu Brahman
Klaten, www.jogjatv.tv Kangge ngindakaken populasi lembu ing Klaten sarta amrih kasembadan mujudi swasembada daging ing Indonesia , Kelompok Tani Ternak Lembu Mukti Andini Satu, Desa Cucukan Kecamatan Prambanan Klaten nyamektakaken kandang mligi kangge ngingah lembu Brahman saking Australia. Kades Cucukan, Heru Pramana mratelakaken, Kelompok Tani Ternak Lembu Mukti Andini Satu, samangke sampun damel kandang kangge ngingah lembu Brahman. Wiyar kandang 600 meter persagi lan amot kangge ngandhangaken lembu cacah 100. Kajawi damel kandang ingkang nelasaken wragat 150 yuta rupiah, piranti sanes ugi sampun dipun cawisaken antawisipun timbangan , pengolahan tlethong lan pakan. Awit sedayanipun sampun samekta pramila peternak ngajab supados pemerintah pusat tumuli masrahaken bantuwan lembu Brahman minangka bebana tumrap kelompok tani ingkang sasab Lomba Agribisnis Sapi Potong Nasional taun 2014. Kandang lembu Brahman beda kaliyan lembu ongol awit lembu kasebat dipun umbar mboten dipun cencang. Ngantos samangke kelompok tani ternak lembu mukti andini dados jujugan studi banding tumrap peternak ing Indonesia, antawisipun Bali , Sumatera lan Pulo Jawa. Dinten Rebo (19/10), Kelompok Ternak Mukti Andini Satu dipun dhatengi dening peternak saking Desa Gogik , Kecamatan Ungaran Barat Kabupaten Semarang.
Seksi Produksi Bidang Peternakan Dinas Pertanian Kabupaten Klaten, Agung Nugroho mratelakaken, bantuwan lembu Brahman dereng dipun pasrahaken dhateng Kelompok Tani Ternak Lembu Mukti Andini Satu awit anggaran saking pemerintah pusat dipun suda. Angkahipun taun ngajeng bantuwan kasebat saged dipun pasrahaken awit taun punika saweg dipun cakaken kangge program budidaya sapi potong persilangan. ( Purwanto )
Artikel Terkait
Berita Terbaru
