Bakti Seni Masyarakat

Sleman, www.jogjatv.tv Padepokan Sekar Jagad Ngayogyakarta nggelar kridha Bakti Seni Masyarakat ing Padukuhan Mutihan, Desa Madurejo, Prambanan, Sleman, dinten Selasa (31/5). Salebeting kalodhangan kasebat dipun gelar Sendratari Roro Jonggrang Ingkar Janji lan Sendratari Hanoman Mahawira.

Pagelaran Sendratari Roro Jonggrang, damel kepranan atusan pamirsa ingkang nyemak saben adegan kepara ngantos tuwuh raos trenyuh. Sinaosa grimis, tetela boten nyurudaken gregeting pamirsa, ningali pagelaran ngantos purna.

Miturut Ketua Padepokan Sekar Jagat,Totok, Bakti Seni Masyarakat mengku ancas kangge nglipur masyarakat ugi minangka tandha pangalembana lan suka wadah tumrap generasi muda, ndayakaken kasagetan salebeting kridha olah seni.Bakti Seni kaajab sageda njurung wiranem handarbeni kagunan budaya mliginipun seni tari lan karawitan.

Miturut Totok, menawi kesenian tradisional boten dipun leluri lan dipun rembakaken dipun kuwatosaken badhe kadhesuk budaya ngamanca ing madyaning jaman modern jalaran lare-lare jaman samangke langkung remen ngginakaken dolanan modern pramila kirang nresnani budaya tradsisional. Awit saking punika, Bakti Seni Masyarakat badhe dipun gelar kanthi ajeg dhateng saben kampung pramila betah panyengkuyung saking maneka pehak, masyarakat, pemerintah punapa dene pelaku seni, amrih rancaging kridha. ( Purwanto )

Artikel Terkait

Merti Dusun Surobayan Hadirkan 10 Gunungan

01 Juni 2016 15:08

Permintaan Gas Melon Meningkat Drastis

31 Mei 2016 10:01

Pengemudi Avanza Maut Terancam Hukuman 6 Tahun Penjara

31 Mei 2016 10:00

Jelang Lebaran, Proyek Perbaikan Jalan Dikebut

31 Mei 2016 09:59