Sadranan Kalibulus

Sleman, www.jogjatv.tv Sadranan inggih lampah adat tilaran nenek moyang ingkang mengku werdi wigati, antawisipun gotong royong, tepa salira, tata karma lan tata trapsila. Sadranan suka pangaribawa ageng salebeting nggatra bebuden luhur sarta lampah spiritual lan dados kalodhangan kangge memetri kagunan budaya adiluhung.

Dhusun Kalibulus, Bimortani, Ngemplak, Sleman, mujudaken salah satunggaling wewengkon ingkang ngantos samangke taksih memetri tradisi sadranan. Awit saking punika, setaun sepisan, saben tanggal 23 Ruwah, warga nyadran. Upacara dipun pandegani dening para sesepuh, kanthi dipun regengaken kirab budaya, kaombyong bregada prajurit ngarak sesaji lan wulu wedaling bumi. Kirab bidhal saking griya sesepuh dhusun tumuju pasareyan cikal bakal dusun, inggih punika Eyang Demang Suto Wiryo, ingkang ageng labuh labetipun tumrap warga Dhusun Kalibulus. Minangka tandha bekti dhateng leluwuripun, para sesepuh lan masyarakat, dedonga sesarengan lan ngintun dhateng pasareyan Eyang Demang Suto Wiryo.

Sasampunipun ziarah, warga dedonga sesarengan nyuwun pangaksama lan memuji syukur awit sih nugraha Gusti Ingkang Hakarya Jagat kalajengaken dahar kembul, wujud guyub rukuning warga.

Sadranan manunggalaken budaya lan religi , ingkang kebak filosofi menggahing bebrayan jawi awit saking punika masyarakat mliginipun generasi muda kedah tumut njagi katentreman lan kerukunan, nuhoni pranatan ingkang wonten, ngaosi labuh labet para leluwur sarta greget memetri tradisi, minangka kaksaya Bangsa Indonesia. ( Heri Susanto )

Artikel Terkait

Kirab Budaya Sadranan Jaranan

02 Juni 2016 10:35

Festival Lan Lomba PK-LK

02 Juni 2016 10:34

Dungkap Ramadhan, Pemkab Nyemak Regi Sembako

02 Juni 2016 10:30

Bakti Seni Masyarakat

02 Juni 2016 10:29