Kepyakan Kampung Umkm Digital
Bantul, www.jogjatv.tv Kangge njurung pangrembakaning Usaha Mikro Kecil dan Menengah, UMKM ing Kabupaten Bantul, Dinas Perindagkop grengseng nindakaken pendampingan. Kejawi mbiyantu promosi lumantar pameran konvensional, Disperindagkop samangke ngepyakaken promosi berbasis on line. Kepyakan Kampung UMKM Digital dipun tindakaken dinten Rebo (30/11) siyang ing Pendhapi Parasamnya Pemkab Bantul.
Kanthi memitran kaliyan Telkom, Pemkab Bantul kupiya mekaraken pasar UMKM lumantar pemasaran lan promosi online. Kalih UMKM Bantul, inggih punika Krebet, Sendangsari, Pajangan sarta Kelurahan Murtigading, Sanden kapiji dados pilot project Kampung UMKM Digital. Sedaya wohing pakaryan UMKM ing kekalih wewengkon kasebat dipun biyantu kanthi sistem pemasaran online mawi jaringan kopatibel saking Telkom. Kanthi makaten pelaku UMKM saged masaraken produk langsung dhateng saindhenging donya ingkang tanpa wates. MoU patembayatan Kampung UMKM Digital dipun tapak asmani Bupati Bantul lan Kepala Telkom Bantul.
Kasi Pengembangan Perdagangan Disperindagkop Bantul, Zanita Sri Andanawati mratelakaken, kangge percontohan enggal wonten 2 teleng UMKM ingkang jinangkepan jaringan internet, inggih punika Krebet lan Murtigading. Ewa semanten sedaya teleng UMKM ing Bantul saged ngajengaken supados kadhapuk dados Kampung UMKM Digital, sauger wonten jaringan optik Telkom badhe dipun ladosi dening Disperindagkop nanging menawi dereng wonten jaringan optik pramila badhe dipun cawisaken jaringan satelit. ( Anang Zainuddin )
Artikel Terkait
Berita Terbaru
