Warga Karangmojo Manggihaken Menhir Umur Ewonan Taun
Gunungkidul, www.jogjatv.tv Warga Desa Bejiharjo, Kecamatan Karangmojo, Gunungkidul, manggihaken menhir ageng ingkang panjangipun langkung saking sekawan meter, dhateng sasanalaya dhusun. Miturut pandugi, menhir kasebat umuripun sampun ewonan taun lan salajengipun badhe dipun titi priksa dening Balai Pelestarian Cagar Budaya.
Parjio Warga Sokoliman, Desa Bejiharjo Kecamatan Karangmojo Gunungkidul ingkang manggihaken menhir dhateng sasanalaya dhusun nalika ngedhug pasareyan. Sasampunipun ngedhug pasiten lebet 30 sentimeter, Parjio, juru kunci sasanalaya kasebat mrangguli barang ingkang nyleneh. Sasampunipun dipun kedug ngantos lebet, tetela sela ingkang kenging paculipun panjangipun 4 meter.,
Sakawit Sasanalaya Sokoliman pancen kathah kapanggihaken situs kina. Sawetawis wekdal kapengker warga ugi asring manggihaken barang kina memper menhir dene papan kapanggihaken menhir pungkasan dening warga dipun wastani pasareyan ingkang wingit.
Menhir utawi batu pemujaan punika dipun ginaken dening masyarakat saderengipun tepang agama, watawis kalih ewu taun saderengipun Masehi lan samangke wonten ing Situs Sokoliman. Situs Sokoliman inggih papan kangge nyimpen benda purbakala ingkang kapanggihaken dhateng sakiwa tengen Desa Bejiharjo. Kathahipun benda kina ingkang kapanggihaken dados titikan bilih Kabupaten Gunungkidul mujudaken wilayah peradaban sepuh piyambak ing Ngayogyakarta. ( Anjar Ardityo )
Artikel Terkait
Berita Terbaru
