Data Pertanian Ing Indonesia Dereng Cetha
Sleman, www.jogjatv.tv Miturut pamawas Komite Ekonomi dan Industri Nasional (KEIN) ngantos samangke data pertanian ing Indonesia dereng cetha, pramila pemerintah kangelan nemtokaken pranatan babagan pertanian. Awit saking punika, pemerintah pusat tembayatan kaliyan perusahaan telekomunikasi nindakaken ujicoba penerapan sistem aplikasi data tunggal pertanian ing Sleman supados data pertanian valid.
Ujicoba penerapan sistem aplikasi tunggal pertanian dipun tindakaken dinten Rebo (2/11) siyang, salebeting pepangihan antawisipun pejabat Pemkab Sleman lan perusahaan komunikasi ingkang badhe nindakaken pendataan pertanian, salajengipun pemerintah pusat lumantar PT Telkom badhe nindakaken pendataan pertanian berbasis internet. Pendataan ingkang dipun tindakakaken mboten namung ngetang cacahing petani sarta wiyar laladan pasabinan kemawon nanging ugi ndata sistem pemupukan lan pemasaran asil pertanian. Miturut, Wakil Bupati Sleman, Sri Muslimatun, ngantos samangke produktifitas pantun ing Sleman tansah surplus nanging Pemkab Sleman nampi kanthi remen gagasan pemerintah pusat kangge nindakaken ujicoba aplikasi data tunggal pertanian ing Sleman. Wontenipun data tunggal, badhe gampilaken pemerintah salebeting nemtokaken kawicaksanan.
Warganing KEIN, Beny Pasaribu mratelakaken, ngantos samangke data pertanian ing Indosenia dereng gumathok awit data saking saben instansi beda-beda satemah pemerintah kangelan nemtokaken kawicaksanan kangge ngindakaken karaharjan petani. Kanthi aplikasi data tunggal pertanian, data temtu valid satemah gampilaken pemerintah salebeting nemtokaken regi asil pertanian. ( Subardi )
Artikel Terkait
Berita Terbaru
