Pameran Potensi Daerah Pemkab Sleman

Sleman, www.jogjatv.tv Pameran potensi daerah ( PPD ) ingkang dipun gelar saben taun dening Pemkab Sleman, dados salah satunggaling kridha kangge njurung greget usaha masyarakat. Taun punika, Pameran Potensi Daerah Sleman badhe dipun gelar wiwit tanggal 20 ngantos 29 Mei benjing, lan kangge kapreluan kasebat panitia sampun nindakaken maneka cecawisan dhateng sakiwa tengen gedung serbaguna lan lapangan Denggung Sleman.

Sawetawis petugas, katingal ubed mranata papan kangge ajang pameran benjing. Kepara sawetawis stand pasar malem ugi sampun dipun cawisaken. Miturut Kepala Dinas Perindustrian Perdagangan dan Koperasi Kabupaten Sleman, Pustopo, salebeting pameran potensi daerah Kabupaten Sleman taun 2016 samangke, cumawis 261 stand. Antawisipun stand instansi pemerintahan, stand maneka kerajinan, stand pertanian lan stand pendidikan. Pameran potensi daerah punika inggih kridha ajeg taunan kanthi ancas kangge mameraken maneka produk kerajinan warga Sleman.

Pustopo ugi mratelakaken, sadanguning pameran, ugi wonten stand panggung kesenian lan budaya, ingkang saben dintenipun inggih siyang lan dalu kangge nggelar pentas seni maneka kagunan seni tradisional ing Sleman. ( Subardi )

Artikel Terkait

Lomba Sesorah Basa Jawa

20 Mei 2016 15:37

Warga Temukan Bebatuan Kuno

20 Mei 2016 15:34

Tekan Angka Kecelakaan Lalin, Polisi Gelar Operasi Patuh Candi

20 Mei 2016 15:33

Sultan Minta YKI Kembangkan Jaringan Tangani Kanker di DIY

20 Mei 2016 15:31