Kursi Ban Kreasi Mantan TKI

Klaten, www.jogjatv.tv Kawiwitan saking kathahing ban mobil bekas ingkang boten kangge, satunggaling mantan TKI Warga Klaten, Jawa Tengah, kanthi rekadayanipun kasil dipun damel kursi lan meja santai. Kursi ban punika boten namung saking laladan Jawa Tengah kemawon nanging ugi saking sanjawining rangkah.

Sampun watawis sekawan taun pungkasan, Ali Aswari, Warga Dhusun Gathak, Desa Drono, Kecamatan Ngawen Klaten, damel meja kursi saking bahan baku ban mobil bekas. Gagasan damel kursi saking ban bekas punika kawiwitan nalika ali mulat kathah ban bekas gadhahan kancanipun ingkang sampun boten kangge malih. Salajengipun Ali ingkang satunggaling mantan TKI dhateng Arab Saudi punika tuwuh gagasanipun kangge ngemonah ban bekas wau lan mawujud dados meja kursi santai. Cara damelipun ugi prasaja, sasampunipun ban bekas cumawis, dipun sukani kajeng kangge nyangga supados kursi kiyat. Salajengipun karet ban dipun pasang kangge papan lenggah, lan dipun sukani spon, kangge nutup ban lan ugi supados langkung empuk. Sasampunipun finishing dipun tutup karpet motif laras kaliyan welingan lan nembe dipun pasangi suku.

Dene ing saben dintenipun, Ali, saged damel kursi ngantos sedasa iji dene reginipun antawis satus seket ewu ngantos kalihatus seket ewu gumantung welingan mutuning bahan. Samangke ingkang weling kursi damelanipun ali boten namung saking tlatah Klaten kemawon, nanging ugi saking sanjawining rangkah, kepara sawetawis wekdal kapengker ugi wonten welingan saking Papua. ( Sri Haryadi )

Artikel Terkait

Bareskrim Polri Mbeslah Puluhan Sato

18 Februari 2016 19:24

Ambal Warsa Basarnas

18 Februari 2016 19:22

Warga Dadap Bong Temukan Arca Kepala Budha

17 Februari 2016 19:40

Pemkot Serahkan Ijazah Siswa Yang Ditahan Sekolah

17 Februari 2016 19:40